Ástarbrautin er 5 km hringleið þar sem gengið er upp hjá Systrafossi, yfir Klausturheiðina, niður hjá Bjarnartættum og komið við á Kirkjugólfinu í bakaleiðinni. Gönguleiðin er mjög vinsæl og er komin inn í ferðabækur og ferðavefi víða um heim.
Styrkurinn að þessu sinni var 6,61 miljón en áður hafði Framkvæmdasjóður ferðamannastaða styrkt lagfæringu á Ástarbrautinni um 6 milljónir. Þá var byggður upp göngustígur í brekkunni þar sem gengið er niður hjá Bjarnartættum, austan við Klaustur. Skógrækt ríkisins sér um þann hluta Ástarbrautarinnar sem liggur upp í gegnum skóginn við Systrafoss og fær skógræktin 1.2 miljónir til að lagfæra og byggja, en á hverju ári þarf að lagfæra stíginn enda umferðin mjög mikil.
Nokkrir aðrir staðir í Skaftárhreppi verða lagfærðir og byggðir upp t.d. Fjaðrárgljúfur, Dverghamrar og stoppistaðurinn í Skaftáreldahrauninu. Á kortið á vef Ferðamálastofu má sjá nánari upplýsingar um styrkveitingar á þessu ári og fyrri ár, bæði af landsáætlun og framkvæmdasjóði ferðamannastaða. Sjá kortið hér.
Ástarbrautin byrjar hjá Systrafossi. Uppi á brúninni er listaverkið Gullmolinn og flesta daga má sjá fólk á göngu. (Ljósm. LM)
Það er mikið útsýni af Ástarbrautinni. Hér sést vel yfir skóla- og íþróttasvæðið. Handan Skaftár er grunnur gestastofu Vatnajökulsþjóðgarðs. (Ljósm. LM)
![Fræðsluskilti Kötlu geopark Fræðsluskilti Kötlu geopark](/static/files/_blob/b4lzxzo3kwdyfg554yn0ie.jpg)
Við gönguleiðina eru fræðsluskilti sem starfsfólk Kötlu jarðvangs setti upp fyrir nokkrum árum. Bæta þarf gróðurskemmdir við skiltin. Sandra Brá, Jóna Björk og Tíbrá í gönguferð með blakliðinu, haustið 2020 þegar ekki mátti koma saman í hóp inni í íþróttahúsi, þá var gott að eiga gönguleið um víðáttuna í heiðinni. (Ljósm. LM)
![Stígurinn við Bjarnartættur Stígurinn við Bjarnartættur](/static/files/_blob/nxttcx38kji5ec35fyok.jpg)
Stígurinn við Bjarnartættur var byggður upp sumarið 2020. Gamli stígurinn er til hægri. Grassvörðurinn var illa farinn og víða rann vatn eftir stígnum og grófst á hverju ári meira og meira, sérstaklega efst. Það voru heimamenn sem unnu verkið með leiðsögn starfsmanns Stokka og steina sem sérhæfir sig í stígagerð og grjót- og torfhleðslum. (Ljósm. LM)