Errósetur á Kirkjubæjarklaustri

Hverjum datt í hug að búa til setur í nafni Erró á Kirkjubæjarklaustri?

Nokkrir af vinum Erró og fjölskyldu datt í hug að byggja safn til að vekja athygli á æviverki Erró en hann hefur sýnt myndlist um allan heim og ævistarf hans er mjög mikið.

Hugmyndin kom fyrst formlega fram árið 2010 og var búin til stofnskrá. Á sama tíma hófst undirbúningur að byggingu gestastofu Vatnajökulsþjóðgarðs á Kirkjubæjarklaustri. Samstarf hófst um verkefnið, með þátttöku stjórnvalda um Þekkingarsetur á Kirkjubæjarklaustri, með gestastofu Vatnajökulþjóðgarðs, Kirkjubæjarstofu, stjórnsýslu Skaftárhrepps og áhugahópi um Errósetur í einni byggingu miðsvæðis á Kirkjubæjarklaustri. Stofnaður var starfshópur og síðan verkefnisstjórn þar til verkefnið færðist til Framkvæmdasýslu ríkisins 2011 og nýr stýrihópur tók við verkefninu. Katrin Jakobsdóttir, menntamálaráðherra tók mjög vel í hugmyndina en ný stjórnvöld hættu þátttöku í samstarfsverkefninu og ákveðin var ný staðsetning fyrir gestastofu þjóðgarðsins sunnan við Skaftá, gegnt Kirkjubæjarklaustri. Myndin hér fyrir neðan af Erró og Katrínu Jakobsdóttur og var tekin 2012 á Hótel Klaustri. (Eig. ÓJ).

Árið 2016 hófu Skaftárhreppur og Kirkjubæjarstofa og samstarf um að koma á fót þekkingarsetri og skrifstofu Skaftárhrepps í heimavistarálmu Kirkjubæjarskóla, stjórn Errósetur gerðist aðili að verkefninu. Sveitarstjórn tók hugmyndinni fagnandi og síðan hefur verkefnið verið unnið í góðu samstarfi Kirkjubæjarstofu, sveitarstjórnar og stjórnar Errósetur.

Er gott að listatengd starfsemi sé á lóð grunnskólans?

Félag um Errósetur telur mjög mikilvægt að Errósetrið sé í námunda við grunnskólann. Myndlist er hluti af uppeldi barna rétt eins og tónlist, íþróttir og bókmenntir. Erró ólst upp á hlaðinu á Klaustri og þar kynntist hann listmálaranum Kjarval sem kom austur til að mála í heimasveitinni en Kjarval var frá Efri- Ey í Meðallandi. Erró fékk að fylgjast með vinnu Kjarvals og þegar Kjarval fór á haustin gaf hann stráknum liti og striga til að prófa sig áfram. Á myndinni hér fyrir neðan sést húsið sem Erró ólst upp og var á milli skólans og burstabæjarins. (Eig. myndar EAV)

Það er mikilvægt að börn alist upp með list og þess vegna telur félag um Errósetur að setrið eigi að nýtast samfélaginu og þá ekki síst skólunum. Þar verði fjölnota salur sem geti nýst undir sýningar annarra en á verkum Erró, bæði myndlistarsýningar, ljósmyndasýningar eða til fyrirlestrahalds. Salurinn gæti líka þjónað sem hátíðasalur fyrir Kirkjubæjarskóla t.d. fyrir skólasetningu, skólaslit, upplestrakeppni og aðrar uppákomur. Tónlistarskóli Skaftárhrepps gæti einnig nýtt sal Erróseturs til tónleikahalds.

Kirkjubæjarstofa Þekkingarsetur hefur verið starfrækt sem sjálfseignarstofnun og mun verða það áfram. Þekkingarsetrið mun annast rekstur verkefna, sjá um sameiginlega kostnað og annast rekstur á safni í Errósetri. Með meirihluta eignarhaldi Kirkjubæjarstofu, Skaftárhrepps og síðar mögulegri aðkomu annarra er hugsunin sú að Eldvilji ehf. verði máttarstólpi í þróun samfélagsins horft til lengri tíma.

Hvað er Errósetur stórt?

Hönnunarteymi arkitektastofunnar Arkís, sem Egill Már Guðmundsson, leiddi vann frumdrög að byggingunni sem átti að hýsa gestastofuna líka. Eftir að ljóst var að gestastofan færi yfir ána varð til sú teikning sem nú liggur fyrir og gerir ráð fyrir um 400 fm grunnfleti. Egill Már Guðmundsson, bróðir Errós, gekk frá frumhugmynd að safninu og tengibyggingu við Kirkjubæjarstofu, þekkingarsetur. Ætlunin er að vinna áfram með þessa hugmynd.

Hvernig verður lífi og starfi Erró gerð skil?

Frá upphafi hefur verið gert ráð fyrir að gestir Erróseturs geti fræðst um líf, feril og þróun listamannsins þar til hann öðlaðist sess í alþjóðlegri listasögu. Sýningar á verkum Erró verða í samstarfi við Listasafn Reykjavíkur en hann hefur gefið Listasafni Reykjavíkur mikið af verkum.  Nú er uppi yfirlitssýning á verkum Erró sem kallast; Erró: Sprengikraftur mynda . Sýningin var opnuð 9. apríl og verður uppi til 29. september 2022.

 Ósk félags um Errósetur er að hægt verði að taka skóflustungu að byggingunni sem allra fyrst.

Félag um Errósetur, Kirkjubæjarstofa Þekkingarsetur, Eldvilji ehf